ਹਰਿਆਣਾ ਪੰਜਾਬੀ ਗੌਰਵ ਪੁਰਸਕਾਰ ਸੁਖਚੈਨ ਸਿੰਘ ਭੰਡਾਰੀ ਨੂੰ 
ਚੰਡੀਗੜ੍ਹ, 9 ਮਾਰਚ (ਚ.ਨ.ਸ.)- ਹਰਿਆਣਾ ਪੰਜਾਬੀ ਸਾਹਿਤ ਅਕਾਦਮੀ ਦੁਆਰਾ ਸਾਲ 2009-10 ਦੇ ਪੁਰਸਕਾਰਾਂ ਦਾ ਐਲਾਨ ਕੀਤਾ ਗਿਆ। ਅਕਾਦਮੀ ਦੇ ਨਿਰਦੇਸ਼ਕ ਸੀ.ਆਰ.ਮੋਦਗਿਲ ਨੇ ਦਸਿਆ ਕਿ ਅਕਾਦਮੀ ਦਾ ਹਰਿਆਣਾ ਪੰਜਾਬੀ ਗੌਰਵ ਪੁਰਸਕਾਰ ਸ੍ਰੀ ਸੁਖਚੈਨ ਸਿੰਘ ਭੰਡਾਰੀ, ਸਿਰਸਾ ਨੂੰ ਦਿੱਤਾ ਗਿਆ ਹੈ, ਜਿਸ ਦੀ ਪੁਰਸਕਾਰ ਰਕਮ 1.25 ਲੱਖ ਰੁਪਏ ਹੈ। ਅਕਾਦਮੀ ਦਾ ਭਾਈ ਸੰਤੋਖ ਸਿੰਘ ਪੁਰਸਕਾਰ ਡਾ. ਰਤਨ ਸਿੰਘ ਢਿੱਲੋ, ਅੰਬਾਲਾ ਛਾਉਣੀ ਨੂੰ ਦਿੱਤਾ ਗਿਆ ਹੈ, ਜਿਸ ਦੀ ਪੁਰਸਕਾਰ ਰਕਮ ਇਕ ਲੱਖ ਰੁਪਏ ਹੈ। ਬਾਬਾ ਸੇਖ ਫਰੀਦ ਪੁਰਸਕਾਰ ਡਾ. ਚਰਨਜੀਤ ਕੌਰ, ਚੰਡੀਗੜ੍ਹ ਨੂੰ ਦਿੱਤਾ ਗਿਆ ਹੈ, ਜਿਸ ਦੀ ਪੁਰਸਕਾਰ ਰਕਮ 51,000 ਰੁਪਏ ਹੈ। ਸੰਤ ਤਰਨ ਸਿੰਘ ਬਹਿਮੀ ਪੁਰਸਕਾਰ ਡਾ. ਸੁਰਦਰਸ਼ਨ ਗਾਸੋ, ਅੰਬਾਲਾ ਛਾਉਣੀ ਨੂੰ ਦਿੱਤੀ ਗਿਆ ਹੈ, ਜਿਸ ਦੀ ਪੁਰਸਕਾਰ ਰਕਮ 51,000 ਰੁਪਏ ਹੈ। ਰਾਗੀ/ਢਾਡੀ/ ਲੋਕ ਗਾਇਕ ਪੁਰਸਕਾਰ ਸ੍ਰੀ ਨਰੇਸ਼ ਕੁਮਾਰ (ਬਿੱਟੂ ਸ਼ਾਹ ਪੁਰੀ), ਅੰਬਾਲਾ ਨੂੰ ਦਿੱਤਾ ਗਿਆ ਹੈ, ਜਿਸ ਦੀ ਪੁਰਸਕਾਰ ਰਕਮ 21,000 ਰੁਪਏ ਹੈ।ਉਨ੍ਹਾਂ ਨੇ ਦਸਿਆ ਕਿ ਪੁਸਤਕ ਪੁਰਸਕਾਰ ਯੋਜਨਾ 2009-10 ਵਿਚ 21,000-21,000 ਰੁਪਏ ਦੇ ਪੁਰਸਕਾਰ ਇਨ੍ਹਾਂ ਵਿਦਵਾਨਾਂ ਨੂੰ ਦਿੱਤੇ ਜਾਣਗੇ। ਕਵਿਤਾ ਵਰਗ ਵਿਚ ਸ੍ਰੀ ਲਖਵਿੰਦਰ ਸਿੰਘ ਬਾਜਵਾ, ਸਿਰਸਾ ਦੀ ਪੁਸਤਕ ''ਸੁਗੰਧ ਲੋਚਦੀ ਸਮੀਰ'' ਨੂੰ, ਕਹਾਣੀ ਵਰਗ ਵਿਚ ਸ੍ਰੀਮਤੀ ਜੋਗਿੰਦਰ ਕੌਰ ਅਗਨੀਹੋਤਰੀ, ਸਿਰਸਾ ਦੀ ਕਿਤਾਬ ''ਮਿੱਟੀ ਦੇ ਬੰਦੇ'' ਨੂੰ, ਨਾਟਕ ਵਰਗ ਵਿਚ ਜੀਵਨ ਬਕਸ਼ੀ, ਕੁਰੂਕਸ਼ੇਤਰ ਦੀ ਕਿਤਾਬ, ''ਜਲਿ ਬਿਨ ਕੁੰਭ ਨਾ ਹੋਇ'' ਨੂੰ ਬਾਲ ਸਾਹਿਤ ਵਰਗ ਵਿਚ ਸ੍ਰੀ ਇਕਬਾਲ ਸਿੰਘ, ਫਤਿਹਾਬਾਦ ਦੀ ਕਿਤਾਬ, ''ਸ਼ੇਰ ਦੀ ਮਾਸੀ'' ਨੂੰ, ਹਾਸ ਵਿਅੰਗ ਵਿਚ ਸ੍ਰੀ ਪ੍ਰੇਮ ਸੇਠੀ, ਕਰਨਾਲ ਦੀ ਪੁਸਤਕ, ''ਪੂਠਾ ਪਾਸਾ'' ਨੂੰ ਅਤੇ ਆਲੋਚਨਾ ਵਰਗ ਵਿਚ ਸ੍ਰੀ ਮਦਨ ਲਾਲ ਕਪੂਰ, ਕਰਨਾਲ ਦੀ ਪੁਸਤਕ, ''ਸਵਤੰਤਰਤਾ ਸੰਗ੍ਰਾਮ ਦੀਆਂ ਇਕਵੰਜਾ ਬੂੁੰਦਾਂ ਖੂਨ'' ਨੂੰ ਪੁਰਸਕਾਰ ਦਿੱਤੇ ਜਾਣਗੇ।ਉਨ੍ਹਾਂ ਨੇ ਦੱਸਿਆ ਕਿ ਪੁਸਤਕ ਪ੍ਰਕਾਸ਼ਨ ਸਹਾਇਤਾ ਗ੍ਰਾਂਟ ਯੋਜਨਾ 2009-10 ਵਿਚ 10,000 ਰੁਪਏ ਦੀ ਗ੍ਰਾਂਟ ਇਨ੍ਹਾਂ ਵਿਦਵਾਨਾਂ ਨੂੰ ਦਿੱਤੀ ਜਾਵੇਗੀ। ਕਹਾਣੀ ਵਰਗ ਵਿਚ ਸ੍ਰੀ ਲੱਖਵਿੰਦਰ ਸਿੰਘ ਬਾਜਵਾ, ''ਸਿਰਸਾ ਦੇ ਖਰੜੇ, ''ਦੁਰਗਾ'' ਅਤੇ ਡਾ. ਰਾਮ ਨਿਵਾਸ ਮਾਨਵ, ਹਿਸਾਰ ਦੇ ਖਰੜੇ, ''ਮਿੰਨੀ ਕਹਾਣੀਆਂ'' ਅਤੇ ਕਵਿਤਾ ਵਰਗ ਵਿਚ ਡਾ. ਮੁਕਤਾ, ਭਿਵਾਨੀ ਦੇ ਖਰੜੇ ''ਅਸਮੀਤਾ'' ਨੂੰ ਦਿੱਤੀ ਜਾਵੇਗੀ।ਨਿਰਦੇਸ਼ਕ ਨੇ ਦੱਸਿਆ ਕਿ ਕਹਾਣੀ ਮੁਕਾਬਲਾ ਯੋਜਨਾ ਵਿਚ ਸ੍ਰੀ ਰਾਮ ਲੋਕ ਕੌਸ਼ਲ, ਪਿੰਜ਼ੌਰ ਦੀ ਕਹਾਣੀ ''ਦੋਸਤੀ'' ਨੇ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਸ੍ਰੀ ਨਾਇਬ ਸਿੰਘ ਮੰਡੇਰ, ਫਤਿਹਾਬਾਦ ਦੀ ਕਹਾਣੀ, ''ਦਲਦਲ'' ਨੇ ਦੂਜਾ ਅਤੇ ਸ੍ਰੀਮਤੀ ਜੋਗਿੰਦਰ ਕੌਰ ਅਗਨੀਹੋਤਰੀ, ਸਿਰਸਾ ਦੀ ਕਹਾਣੀ ''ਮਾਸੂਮ'' ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ। ਪਹਿਲਾ, ਦੂਜਾ ਅਤੇ ਤੀਜਾ ਸਥਾਨ ਪ੍ਰਾਪਤ ਕਰਨ ਵਾਲੇ ਕਹਾਣੀਕਾਰਾਂ ਨੂੰ 5,000 ਰੁਪਏ, 4,000 ਰੁਪਏ ਅਤੇ 3,000 ਰੁਪਏ ਦੀ ਰਕਮ ਦੇ ਪੁਰਸਕਾਰ ਦਿੱਤੇ ਜਾਣਗੇ। ਇਸ ਦੇ ਨਾਲ ਹੀ 1,500-1,500 ਰੁਪਏ ਦੀ ਰਕਮ ਦੀ ਦੋ ਸਾਂਤਵਨਾ ਕਹਾਣੀ ਪੁਰਸਕਾਰ ਸ੍ਰੀਮਤੀ ਮਨਜੀਤ ਕੌਰ, ਅੰਬਾਲਾ ਛਾਉਣੀ ਦੀ ਕਹਾਣੀ ''ਮੀਨਾ ਬਾਜ਼ਾਰ'' ਨੂੰ ਸ੍ਰੀਮਤੀ ਇੰਦੂ ਗੁਪਤਾ, ਫਰੀਦਾਬਾਦ ਦੀ ਕਹਾਣੀ ''ਮਿੱਟੀ ਦੇ ਮਹਿਲ'' ਨੂੰ ਦਿੱਤੇ ਜਾਣਗੇ।
